Ou est Nembroth le grant jayant.

Ou est Nembroth le grant jayant.


Ou est Nembroth le grant jayant

Qui premiers obtint seigneurie

Sur Babiloine? Ou est Priant,

Hector et toute sa lignie?

Achillès et sa compaingnie,

Troye, Carthaige et Romulus,

Athene, Alixandre, Remus,

Julius César et li sien?

Hez sont tous cendre devenus:

Souflez, nostre vie n'est rien.


Ou est David le combatant,

Judas Machabée et Urie?

Ou est Charlemaine et Rolant,

Godefroy qui fut en Surie,

Baudouin, leur chevalerie,

Josué, Daires et Artus

Et ceuls qui conquirent le plus

Sarrazin, Juif et Crestien?

Hez sont mis en pouldre et corrups:

Souflez, nostre vie n'est rien.


Ou est Atille le tyrant,

Caton plain de phillosophie,

Hercules, Jason conquérant,

Socratès et son estudie

Augustin en théologie,

Le pouete Virgilius,

Es estoilles Tholomeus,

Ypocras le phisicien?

De mort n'est d'eulx eschapez nulz:

Souflez, nostre vie n'est rien.


Prince, il n'y a que les vertus.

Bien faire et esjouir ça jus

Et départir pour Dieu du sien

Aux povres, pour régner la sus;

Nos eages est tantost conclus:

Souflez, nostre vie n'est rien.


Eustache Deschamps .