Les Chapeaux.

Les Chapeaux.


Levez ces cueuvrechiefs plus hault

Qui trop cueuvrent ces beaulx visages;

De riens ne servent telz umbrages,

Quant il ne fait hale ne chault.


On fait a Beauté qui tant vault,

De la musser, tort et oultraiges:

Levez ces cueuvrechiefs plus hault

Qui trop cueuvrent ces beaulx visages.


Je sçay bien qu'a Dangier n'en chault,

Et pense qu'il ait donné gaiges

Pour entretenir telz usages:

Mais l'ordonnance rompre fault,

Levez ces cueuvrechiefs plus hault.


Charles D'Orléans .